Corsetti plu prezidos
de Kalle Kniivilä
—
Laste modifita:
2004-05-26 13:04
Renato Corsetti kandidatas por dua periodo kiel prezidanto de UEA. Ne estas aliaj kandidatoj por tiu posteno. La estraron forlasos Chong, Gbeglo, Lipari kaj Tonkin. "Nia movado verŝajne ne estas preta por vera elekto-kampanjo kaj por konkuro interpersona", komentas Edwige Tantin-Ackermann.
En sia raporto, dissendita al la komitato de UEA, la
elekta komisiono proponas ke Renato Corsetti daŭrigu kiel prezidanto. Kiel
vic-prezidanton la elekta komisiono volas vidi s-ron Ivo Osibov, la
nunan ĝeneralan sekretarion de UEA. La lokon de Osibov kiel ĝenerala
sekretario laŭ la sama propono prenos s-ino Ulla Luin el Svedio. La
elekto de Corsetti, Osibov kaj Luin ŝajnas en la praktiko certa, ĉar
por tiuj tri postenoj ne estas proponataj alternativaj kandidatoj.La estraron evidente forlasos la nunaj vic-prezidantoj Humphrey Tonkin kaj Lee Chong-Yeong - iliaj nomoj ne estas menciitaj en la propono de la elekto-komisiono. Same foriros la estraranoj Gbeglo Koffi kaj Michela Lipari.
La 26-an de majo la raporto estis publikigita en la retejo de UEA. Tie aperis ankaŭ prezentoj de la kandidatoj.
Krom Corsetti kaj Osibov, el la nunaj estraranoj rekandidatas Ans Bakker-ten Hagen (nun estrarano pri financoj kaj administrado) kaj Andrej Grigorjevskij (nun estrarano pri informado). Tamen ilia reelekto ne estas certa.
Aldone al Ulla Luin, kies elekto ŝajnas certa, novaj nomoj estas Maritza Gutierrez Gonzales, Claude Nourmont, Amri Wandel kaj Yu Tao. S-ino Gutierrez estas ĵurnalisto el Havano kaj komitatano A por Kubo. Claude Nourmont estas bibliotekisto loĝanta en Luksemburgio, sed komitatano A por Francio, kaj vicprezidanto de la landa asocio de UEA en Francio. Amri Wandel estas astronomiisto el Israelo, komitatano B kaj antaŭa estrarano de UEA. Yu Tao estas komitatano A por Ĉinio, kaj ĝenerala sekretario de Ĉina Esperanto-Ligo.
Entute estas do naŭ kandidatoj, el kiuj Corsetti, Luin kaj Osibov estos aŭtomate elektitaj, se la propono de la elekta komisiono restos la sola. Restas ses pliaj kandidatoj, el kiuj la komitato laŭ la propono devos elekti kvar. La elekta komisiono do komplete malsukcesis en sia deklarita intenco, ke por ĉiu estrara posteno estu minimume du kandidatoj.
- Nia movado verŝajne ne estas preta por vera elekto-kampanjo kaj por konkuro interpersona, komentis Edwige Tantin-Ackermann en la raporto de la elekta komisiono.
La propono de la elekta komisiono jam kaŭzis intensan diskuton.- Laŭ mi, la komisiono simple ne plenumis sian laboron, kaj necesas ke la komitatanoj proponu aliajn taŭgajn kandidatojn, opiniis Yves Bellefeuille.
- Povas esti ke la Komisiono ne plenumis sian laboron, tre bone. En Pekino, la Komitato elektos alian Elektan Komisionon, pli kapablan, kun magiaj povoj, respondis Edwige Tantin-Ackermann en la retpoŝta listo de la komitato.
Laŭ Edwige Tantin-Ackermann, kiu estas la plej aktiva membro de la elekta komisiono, la komisiono faris ĉion eblan por trovi multajn kandidatojn, sed tio ne sufiĉis, ĉar neniu volis kandidati.
- Ĉu oni kandidatigu kiun ajn, nur ke estu pluraj nomoj inter kiuj elekti, ŝi miras.
Estas interese, ke neniu el la kandidatoj por B-komitataneco, kiuj publike deklaris ke ili pretas kandidati ankaŭ por la estraro de UEA, ricevis lokon en la listo de kandidatoj. (Ja ricevis lokon inter la kandidatoj Ivo Osibov kaj Amri Wandel, sed ili jam estas komitatanoj.)
Laŭ Edwige Tantin-Ackermann pri la senalternativa elekto kulpas unuavice la tro pasiva komitato.
- Ankaŭ mi legis en Libera Folio pri preteco de kelkaj personoj kandidatiĝi por la Estraro. Sed Libera Folio ne estas la Elekta Komisiono. Al tiu ĉi oni devas anonciĝi, prezenti la necesajn subtenojn, simple sekvi la preskribojn de la Regularo.
Male ol en antaŭaj jaroj, la elekta komisiono ĉi-foje alprenis tre pasivan rolon. Anstataŭ aktive labori, por ke kapablaj homoj, kiuj anoncis sian pretecon kandidati, ricevu subtenon de komitatanoj, ĝi nur faris ĝeneralajn alvokojn.
- Bedaŭrinde, malgraŭ ke kelkfoje mi pere de tiu ĉi listo puŝis al kandidatigo, tio ne efikis, lamentas Edwige Tantin-Ackermann en la komitata retpoŝta listo.
La elekta regularo evidente havas internajn kontraŭdirojn, ĉar aliaj kandidatoj, ol tiuj menciitaj en la listo de la elekto-komisiono, rajtos esti proponitaj dum la komitata kunsido nur, se la komitato unue malakceptis la kandidatojn proponitajn. Do, ĉiuj kandidatoj estas egalaj, sed kelkaj estas pli egalaj.
Tamen, se la komitato ial ne estus kontenta pri la propono de la elekto-komisiono, ĝi efektive povas elekti inter si pliajn kandidatojn, kaj tio ja okazis de tempo al tempo.
Laŭ la elekta regularo, aldona kandidatiĝo principe devus okazi buŝe, en la komitata kunsido kie la nova kandidato mem ĉeestu kaj prezentu siajn movadajn celojn. En escepta okazo la komitato rajtas akcepti ankaŭ la kandidatiĝon de neĉeestanta persono, se ĝi disponas pri sufiĉaj informoj. Ne estas klare, kion signifas "escepta kazo".
Aliflanke, kulpas pri la nekonsidero ankaŭ tiuj homoj kiuj anoncis sian kandidatecon, sen kontakti la komisionon. Ne estus tro altrude sendi retmesaĝon kun iom "oficiala kandidatiĝo" al la komisiono.
Trie, se estas ĝuste priskribita en Libera folio la regularo por elektoj, ĝi meritas prikonsideron.
Laste, ni malgraŭ kritikoj ĝoju, ke kandidatiĝas multaj kapabluloj por komitataneco, kaj ke almenaŭ por kelkaj lokoj en la estraro ekzistas pluraj kandidatoj.
La ĉi-jara elekto ŝajnas paŝo en la ĝusta direkto, kvankam daŭre restas pluraj paŝoj. La kritikantoj proponu konkretajn plibonigojn, ne nur grumblu pri neperfekteco.
Bord Hekland
Norvegio