Nova retejo de TEJO: bela, sed sen Pepo
Dum sia kunsido en Roterdamo en la unua semajno de aprilo la estraro de TEJO finaprobis la lanĉon de la nova retpaĝaro kiu nun videblas ĉe www.tejo.org. Ĝia ĉefarkitekto estas la estrarano de TEJO pri informado Chuck Smith.
La plano de TEJO estas dum la proksimaj semajnoj finpoluri la enhavon de la konstanta kerno de la paĝaro, kaj en la dua duono de majo lanĉi ĝian tradukadon en kelkajn naciajn lingvojn. Poste oni planas vigligi la paĝaron per retaj taglibroj de la membroj, kaj per forumo.
Steven Brewer, unu el la kreintoj de la nova paĝaro de ELNA, konstatas ke la pozitivaj spertoj de ELNA estis uzataj ankaŭ de TEJO.
- TEJO, almenaŭ parte pro la sperto de la nova retpaĝaro de ELNA, ekuzas la saman enhav-administran sistemon Drupal por sia nova retejo. Ili eĉ uzas la Drupal-temon "Chameleon", la saman sur kiu baziĝis la temo de ELNA. Chuck "Amuzulo" Smith, la estro de la teamo kiu faris la laboron, ankaŭ partoprenis la starigon de retpaĝaro de ELNA kaj kontaktis min kelkfoje dum li esploris la kapablojn de Drupal kaj faris la laboron ĉe TEJO.
La aspekto kaj aranĝo de la nova retejo laŭ Steven Brewer estas klara plibonigo kompare kun la antaŭa, tamen kun kelkaj manketoj.
- La nova retpaĝaro de TEJO estas tre pura kaj bela - ĝi estas simpla kun multe da blanka spaco. La tekston, speciale tiun de la ligoj, mi trovas malgranda, sed TEJO estas ja organizaĵo de junuloj, do por ili verŝajne ne gravas. Kelkaj gravaj aferoj estas kaŝitaj - miaopinie Pasportan Servon oni pli facile trovu. Sed mi ĉiam emas meti tro da aĵoj sur la unua paĝo kaj tio estas afero de gusto - aliaj preferas ke la unua paĝo restu simpla. Oni neniam plaĉos al ĉiuj.
Iom dubinda Steven Brewer trovas la fakton, ke TEJO elektis ne uzi bildojn el veraj Esperanto-aranĝoj, sed aranĝitajn fotojn kiuj kredeble havas nenian rilaton al Esperanto.
- La bildoj estas tre profesiaj, trafaj, kaj taŭgaj, sed ili verŝajne ne estas bildoj de Esperanto-parolantoj. Ili kredeble devenis de iu firmao kiu vendas bildojn por reklamoj kaj similaj celoj. Unu danĝero tiam estas ke iuj el la homoj en la bildoj iam fariĝos famaj (aŭ fifamaj). Alia estas ke oni rekonos la saman bildon ĉe reklamo aŭ alia retpaĝaro kiu pritraktas ion kontraŭ-Esperantan. Antaŭ kelkaj monatoj, la firmao Microsoft ekuzis tian bildon, kian oni rekonis de multaj aliaj reklamoj, inter ili por konkurencaj projektoj kaj oni multe mokis Microsoft pro tio. Kaj, mi devas konfesi, mankas al mi la papago.
Laŭ oficiala komuniko, TEJO intencas baldaŭ anonci konkurson pri nova maskoto, sed ŝajne la celo ne estas komplete forigi la papagon Pepo, kiu jam de dudeko da jaroj ilustras diversajn eldonaĵojn de TEJO. Ankaŭ sian emblemon TEJO planas renovigi. Ĉar aldone estas planata konkurso pri fotoj por la paĝaro, povas esti, ke ankaŭ la fotoj en la nova paĝo de TEJO estas provizoraj, eble eĉ la baza aspekto de la paĝaro.
Kompare kun la freŝa paĝaro de TEJO, la tre informriĉa retejo de UEA subite ekaspektas iomete malnova, konstatas Steven Brewer.
- La retpaĝaro de UEA, kiu estas en stilo tre moda antaŭ 10 jaroj, aspektas nun iomete eksmoda. Samtempe, la retpaĝaro havas klaran, multlingvan, organizon, kiu estas ja malfacila afero. La manko de simboloj kaj unueca kolora temo estas ĝustigindaj - la plej granda miskonekto okazas inter la unua paĝo kaj la aliaj paĝoj. Kiam vi pluiris de la unua paĝo, la organizado estas bona, estas multaj indikiloj pri tio, kie oni estas en la retejo, kiuj tre helpas.
Laŭ li estas klare, ke la precipa celo de la retejo de UEA estas doni informojn al tiuj, kiuj scias kion ili serĉas, ne allogi novajn interesiĝantojn.
- En la paĝaro de UEA preskaŭ tute mankas bildoj. La plej multaj homoj tamen trovas bildojn utilaj kaj allogaj por esprimi homan konekton. Kiel loko por trovi informon, la UEA-retejo ege taŭgas. Por allogi homojn kaj montri Esperanton kiel ion ekkonindan aŭ lernindan, oni evitu la retpaĝaron de UEA.
la paĝaro de TEJO daŭre estas finpolurata, kaj ĝia grafika aspekto ankoraŭ ne estas definitivigita; esence, la uzata mastrum-enhava sistemo drupal permesas umi la grafikan aspekton ĝis nerekonebleco, sen devi iel ajn tuŝi la tekstan enhavon
TEJO daŭre planas konservi Pepon kiel sian maskoton (la vortoj "aldone al la papago Pepo" (TEJO Aktuale) donas ne "ŝajnon", sed diras tion tute klare), kaj ĝi plej verŝajne jes trovos sian lokon en la definitiva grafika aspekto de la paĝaro
anstataŭ paroli pri "kelkaj", ni esperas post du-tri monatoj povi fieri pri "multaj" naciaj lingvoj (la eksa paĝaro de TEJO legeblis en 29 lingvoj, kaj mi ne vidas kialon, kial la nuna ne povontus esti en same impresa nombro);
la radikon "mult-" mi tamen ne uzus parolante pri la "lingveco" de la retpaĝaro de UEA: multlingveco, same kiel informi ne-esperantistojn pri esperanto, ja ne estas ĝia celo: por tio, laŭ reprezentantoj de UEA, servu www.esperanto.net; aliflanke, se uea.org estas travideble informdona, tiukaze min kiel uzanton apenaŭ zorgigas, kiam ĝia aspekto estis, estas aŭ estos "moda"
Marteno MINIĤ