Probal Dasgupta volas mezuri sian subtenon
La prezidanto de UEA kandidatos en la venontjara elekto de komitatanoj B, kiujn elektas la individuaj membroj de la asocio. Se li sukcesos ricevi la subtenon de la membroj, li rekandidatos por la posteno de prezidanto por dua mandatperiodo. Tion li anoncis en Bjalistoko, responde al demando pri tio, kiel la membroj de UEA povas influi la elekton de la prezidanto.
Proksimume 120 homoj marde ĉeestis la tradician kongresan programeron "la estraro respondas" en salono Lapenna, la plej granda ejo en la konstruaĵo de la Bjalistoka teknika universitato, en kiu okazas la ĉi-jara Universala Kongreso de Esperanto.
La plej multaj demandoj ne rekte rilatis al la laborkampo de la estraro, kaj ofte eĉ ne estis demandoj, sed riproĉoj aŭ insistaj proponoj.
Tipa ekzemplo estis la propono de ĉeestanto kiu postulis, ke ĉiuj kongresanoj surmetu naciajn kostumojn kaj faru procesion tra la urbo por propagandi por Esperanto. Alia kongresano insistis, ke la kongresa libro longe estis la plej bona propagandilo por Esperanto, sed ne plu, ĉar ĝi nun ne enhavas liston de la ĝisnunaj kongresoj.
Estis tamen ankaŭ pli seriozaj demandoj. Kongresano Bernhard Maurer el Germanio demandis, kiam la membroj rajtos rekte elekti la prezidanton de UEA.
- Oni elektas ĉe UEA la prezidantojn preskaŭ kiel en la komunista sistemo, en malgranda cirklo. Ĉu ne estas jam tempo, ke ĉiuj membroj elektu la prezidanton, li demandis.
Kelkaj el la ĉeestantoj aplaŭdis.
Kiam prezidanto Probal Dasgupta respondis, li unue atentigis, ke la afero pli rilatas al la elekta komisiono ol al la estraro de UEA. Li tamen samopiniis kun la demandanto, ke la membroj povu esprimi sian opinion.
- Vi tute pravas, ke la membraro devus iamaniere havi voĉon en la decidado. Ĉi-foje mi intencas kandidatiĝi por komitataneco B. La individuaj membroj scios, ke mi konsideras denove kandidati por la prezidanteco. Ili povos elekti, ĉu aŭ ne voĉdoni por mi, kaj mi akceptos la rezulton kiel mesaĝon de la membraro.
La respondon de Probal Dasgupta kompletigis estrarano José Antonio Vergara, kiu akcentis, ke jam nun ekzistas demokratia mekanismo en UEA, sed ke tiu sistemo ne estas sufiĉe bone uzata.
- Vi membroj devus pli firme kontroli, kion viaj komitatanoj faras, kiel ili kontribuas al la laboro de la asocio.
Dieter Rooke, kiu estas interalie sekretario de Internacia Komunista Esperantista Kolektivo, demandis, kial estas malpli ol 2.000 partoprenantoj en la Bjalistoka Universala Kongreso en la jaro 2009, kiam la kongreso en Varsovio en 1987 havis proksimume 6.000 partoprenantojn. Probal Dasgupta klarigis la diferencon per la disfalo de la komunisma sistemo en orienta Eŭropo:
- La klariga evento, kiel vi scias, okazis en 1989, kiam ŝanĝiĝis la strukturo de la eŭropa mondo. Post 1989 multe malpli da homoj en la orienteŭropaj landoj same aktive partoprenas la movadon kiel antaŭe. La tuta esperanta gazetaro tiam diskutis la fakton ke tio okazos. Mi ne estas sufiĉe saĝa por aldoni ion al la saĝo de la tiutempaj analizistoj.
Estrarano José Antonio Vergara ricevis aplaŭdojn, kiam li pluiris laŭ la sama pado:
- Tiam Esperanto por multaj en la oriento estis la fenestro al Eŭropo. Eble ni do proponu al la poloj reveni al la tiama sistemo? Eble tion volas proponi Dieter?
