Historiaj akcentoj en la 30-a Malferma Tago de UEA
Kun la movada vivo en la venontjara kongreslando konatigis Juan Besada el Kubo, kiu prelegis pri la historio kaj nuntempaj apartaĵoj de la tiea Esperanto-movado. La nederlanda esperantista paro Johan kaj Svetlana Derks rakontis pri sia jarkomenca instrua aktivado en Afriko, kaj pri interesa projekto realigota en Burundio, pri kiu ili ricevis ideon dum sia vojaĝo. Douwe Beerda el Nederlanda Esperanto-Junularo prezentis la agadon de NEJ kaj la viglan retejon pri homaj rajtoj, www.homajrajtoj.org.
Surpriza programero estis tri filmoj. Unu estis farita en la unua Internacia Junulara Kongreso en la nederlanda vilaĝo Groet en 1938, kie estis fondita Tutmonda Junulara Organizo, la posta TEJO. Du aliaj estis filmitaj de la brita esperantisto John Gobourne en IJK en Gdansko kaj UK en Varsovio en 1959. Gobourne donacis la originalajn 8-milimetrajn bendojn al UEA. La fondaĵo Esperantic Studies Foundation subvenciis kaj organizis ilian kopiadon sur DVD.
La Libroservo vendis librojn k.a. varojn sume por 1307 eŭroj. Plej multnombre (6 ekz.) vendiĝis La Asocio, artikolaro de Ziko van Dijk pri la historio de UEA, sekvata de Morto de artisto de Anna Löwenstein kaj la gvidlibro por KER-ekzamenoj , Esperanto de nivelo al nivelo (po 5 ekz.), kaj la UEA-historio Utila Estas Aliĝo de Ulrich Lins (4 ekz.).
Programeroj de la 30-a Malferma Tago estas spekteblaj rete ĉe Ipernity.
La venonta Malferma Tago de la Centra Oficejo okazos la 28-an de novembro kaj estos dediĉita al la 100-a datreveno de prof. d-ro Ivo Lapenna.
Gazetara komuniko de UEA
