La revuo de UEA ekhavos novan redaktoron
Jam antaŭ pli ol unu jaro, en septembro 2014, la estraro de UEA esprimis malkontenton pri la enhavo de la revuo Esperanto, kaj tial decidis ne longigi la kontrakton de la redaktoro por plena jaro, sed doni al li duonjaran provperiodon por vidi, ĉu li sukcesos plibonigi la ĵurnalisman traktadon de movade gravaj temoj. La decido pri la daŭrigo devis esti anoncita ĝis la fino de marto 2015, sed neniam aperis.
Responde al demando de Libera Folio la prezidanto de UEA, Mark Fettes, tiam fine konfirmis, ke la estraro decidis longigi la kontrakton de Fabricio Valle je iom pli ol jaro, ĝis la julia-aŭgusta numero de 2016.
– En tiu tempo ni havos novan ĝeneralan direktoron kaj reekzamenos multajn flankojn de la organizo de UEA, inkluzive de la rolo de la revuo en la nuntempa rete kunligita mondo, Mark Fettes tiam klarigis.
La 18-an de novembro 2015 Mark Fettes tamen surprize anoncis al la komitato de UEA, ke Fabricio Valle forlasos sian postenon jam post la finpreparo de la aprila numero 2016, do praktike en marto. Sekve UEA nun ekserĉas novan redaktoron, kiu devos ekofici post kvar monatoj.
En la anonco pri la posteno la estraro de UEA mencias, ke la nova redaktoro havos respondecon ankaŭ pri renovigo de retejoj de UEA:
La Estraro serĉas personon, kiu aktive kontribuos al la efektivigo de la Strategia Laborplano de UEA, kiu estas iniciatema kaj kreema, kaj kiu interesiĝas pri plej diversaj aspektoj de la movado. La redaktopolitiko de la revuo estas proksime ligita al la mastrumado de informoj en la retejoj de UEA, kaj la redaktoro do samtempe estos ano de teamo por la renovigo de tiuj retejoj.
Ne klaras, kial la kontrakto estos finita antaŭtempe, nek ĉu tio okazas laŭ iniciato de Fabricio Valle mem aŭ pro decido de la estraro de UEA. La prezidanto de UEA, Mark Fettes, ankne volis respondi al demandoj de Libera Folio pri tiu temo:
– Vi rajtas demandi pri tio Fabricio-n mem, sed mi preferas ne mem plu komenti. La sola esenca ŝanĝo en la taskaro estas la eksplicita mencio de la kunlaboro de la redaktoro pri la reteja renovigo de UEA. Pri la planoj por tiu renovigo mi ankaŭ raportos al la Komitato.
La sinproponoj por la redaktora posteno devas atingi la Centran Oficejon de UEA ĝis la fino de januaro 2016. Poste taŭgaj kandidatoj estos intervjuataj telefone.
La sola fonto mallonge komentinta pri l' afer' estas la blogo de Silfer (http://www.esperantio.net/index.php?id=2663; cetere, tiu blogo estas iom misgvide konata sub la nomo "HeKo - retagentejo de la Esperanta Civito"). En sia blogo Silfer asertas, ke "la redaktoro de la UEA-organo, s-ro Fabrício Valle, decidis forlasi sian postenon". Nu, nenie mi trovis (ankaŭ ne en ĉi tiu LF-artikolo), ke Valle "decidis forlasi". Ĉu Silfer sukcesis kolekti pli detalajn informojn? Povas esti. Sed se juĝi laŭ la nivelo de liaj kutimaj blogaĵoj (misgvide reklamataj kiel novaĵoj de retagentejo), oni apenaŭ povas atendi tion. Tio ne estas nur mia opinio: vidu la priajn, kaj pravajn, komentojn de Didi Weidmann en la publika UEA-komitata diskutgrupo (https://groups.yahoo.com/[…]/8733): "en Heko ĵus aperis iu stranga klaĉraporto pri niaj voĉdonaj problemoj. Iu malserioza ĵurnalisto tie miscitas min...".