Dekjariĝo de Instituto Zamenhof en Togolando
Laborantoj kaj gvidantoj de Instituto Zamenhof
Vendredon, la 12-an de septembro dum la mateno ekde la naŭa horo la partoprenantoj jam alvenis kaj ekokazis la prezentaĵoj.Unue, muzikaj kaj kantantaj grupoj el lernantoj de la instituto ZAMENHOF prezentis al la partoprenantoj muzikaĵojn kaj kantojn. Poste sekvis prezentado de filmo kiu rilatas al la dek jaroj da ekzistado de Instituto Zamenhof.
Posttagmeze ĉirkaŭ la sesa horo okazis sur la sportotereno de Instituto ZAMENHOF futbalmatĉo kiu kontraŭmetis la teamojn de la ekslernantoj kaj la laboristoj de Instituto ZAMENHOF. La matĉo okazis bone dank’al la partopreno de la ludantoj, la ĉeestantaj lernantoj kaj amikoj de la instituto. Tiun vendredon vespere fine de la matĉo la ludintoj povis kuntrinki.
Sabaton, la 13-an de septembro 2014 pluokazis la festo de dekjariĝo de la instituto. Tiun sabaton jam ĉirkaŭ la naŭa horo matene kvar lernantinoj kaj amikinoj de Instituto ZAMENHOF bonvenigis kaj sidigis la gastojn. Je la deka horo matene komenciĝis la ceremonioj gvidataj de sinjoroj Dzifa GBEGLO kaj Didier AGBOLO kun muzikaj, ĥoraj kaj kantataj prezentaĵoj. Poste la direktoro de la instituto ZAMENHOF Alfred HUNKPORTIE kaj la reprezentanto de la ekslernantoj de la instituto Tete AYENA prezentis siajn paroladojn. Sekve, kelkaj lernantoj de Instituto ZAMENHOF deklamis poemojn esperantlingvajn kaj franclingvajn. Sekvis la prezentado de la parolado de la reprezentantoj de UFEPLAT (Federacio de Fondintoj de Privataj lernejoj en Togolando) kaj de la asocio de la gepatroj de la gelernantoj de La instituto. Poste, kantisto speciale invitita prezentis muzikaĵojn al la ĉeestantoj. Sekvis la legado de la diversaj leteroj kiujn ricevis Instituto ZAMENHOF de multaj alilandaj amikoj. Post tio Sinjoro Markus ATTAGLO prezentis la historion de 2004 ĝis 2014 de la Instituto. Sekve okazis inlerludo konsistanta el danko kun seĝoj, kaj de balonoŝveligado. Poste sinjoro SAGBADJELOU prezentis la Esperantan lingvon kun disdonado de bazaj kursoj pri Esperanto. Poste la partoprenantoj de la libertempaj esperantokursoj kiuj okazis de la 4-a ĝis la 29-a de aŭgusto 2014 ricevis siajn premiojn kaj atestilojn. Sekvis surpriza momento.
La surprizo estis la malkaŝo de granda foto sur kiu troviĝas kvar generacioj de gelernantoj de IZO kiuj sukcesis je 100% la jarfinajn ekzamenojn danke al la instruisto ALATE Adjewoda. La programeron gvidis s-ro GBEGLO Koffi, kiu transdonis la foton al s-ro ALATE. La etoso estis tiom emocia, ke interludo devis okazi por trankviligi ĉiujn, antaŭ ol venis la tempo por manĝi.
Okazis panomanĝado kaj akvotrinkado. Ĉirkaŭ la 14a horo la gastoj de la ceremonioj profitis por vere plenigi siajn ventrojn per buntaj manĝaĵoj. Ĉio finiĝis per diversaj grupaj fotadoj.
Instituto Zamenhof nun strebas al sia dudekjariĝo. La unuaj dek jaroj sukcese pasis danke al senlacaj laboroj de Hans kaj Ans BAKKER, Nelly kaj Alexander HOLEVITCH, Evelyne ROTELINI kun la asocio UNE ECOLE AU TOGO, la asocio TIETO kun ATTIOGBE-AGBEMADON B. MENSAH, SAGBADJELOU Kokou, GBEGLO Koffi kaj DOUMEGNON Koffi. Decas aldoni, ke la organizadon de la festo kunordigis DOUMEGNON Koffi, dum la superrigardado taskiĝis al GBEGLO Koffi. Esperindas, ke tiu ĉi teamo plugvidos la lernejon ĝis alia jubileo.
Raportis Dzifa GBEGLO
