Kokakolao vendas sin: Faras reklamon kun Noam Chomsky

“Drink Coke – imperialism with a refreshing face!” (“Trinku kokakolaon – imperiismo kun vizaĝo refreŝiga!”, red.)

Tiel sonas la slogano de la tri novaj reklamaj filmetoj, en kiuj la profesoro Noam Chomsky, la aktivulino Naomi Klein kaj la filozofo Slavoj Žižek alternas prezenti botelon kun la bruna trinkaĵo kaj laŭdi ĝin en parolturnoj iom pli akademiaj ol kutime. Komuna al ĉiuj el la Kokakolaaj entuziasmuloj estas kritikado de tutmonda kapitalismo kaj usona kultura imperiismo.

“Ni volas turni nin al tiuj homoj kiuj pro politikaj kaŭzoj ne trinkas Kokakolaon, sed plej interne ja ŝatas la guston. Uzante konatajn kritikantojn de kapitalismo ni signalas ke oni certe povas esti konscia pri siaj objektivaj interesoj kaj kompreni la absurdecon de la tutmondiĝo dum oni samtempe trinkas Kokakolaon,” klarigas la dana reprezentanto de Kokakolao, Irene Foss Jensen.

Kokakolao vendis sin

En aliaj komercaj rondoj oni tamen skeptikas pri la kunlaboro de la entrepreno kun la tri intelektuloj.

“Kokakolao tute simple vendis sin,” eldiras Dale Weinbaum, kiu estas surmerkatiga direktoro de Pepsi, kaj opinias ke Kokakolao devus ne moviĝi for de pure kapitalismaj kaj ĝenerale akceptitaj ĉeffluaj valoroj donante al homoj kiel Chomsky kaj Klein paroltempon:

“Iam oni povis kalkuli kun aŭtenta fokuso pri la neta rezulto ĉe Kokakolao. Kvankam konkurantoj, mi sciis ke ni lastinstance batalas por la sama nobla celo: gajni monon. Sed nun mi jam ne estas tiel certa.”

Senpaga sportosako kun si

Irene Foss Jensen tamen hastas certigi al la klientoj de Kokakolao ke la valoroj de la firmao restas la samaj:

“En Usono oni longe parolis kun Noam, Naomi kaj Slavoj pri tio ĉi, tiel ke ĉiuj sekvis la saman komercan linion kaj ne komencus subite paroli pri gentrifikacio aŭ anarkosindikalismo. Ni estas respektaj al ilia akademia mondo, sed ni ne deziras ke niaj klientoj konceptu ĉi tion kiel ĉipan cedon al vulgara sistemkritiko.”

Ankaŭ Chomsky entuziasmas pri la kunlaboro kun Kokakolao:

“Vere amuze estis filmigi la multajn eksplodojn – kaj tiam oni povis kunporti senpagan sportosakon kun si hejmen!”

(Ŝtelita el ĉi tie).