Feminisma iniciato kaperita de la Civito

Reage al la okazintaĵoj ĉirkaŭ la fondo de la nova organizaĵo, la du ĉefaj iniciatintoj de Feminisma Esperanto-Movado, la geedzoj Dorothea kaj Hans-Georg Kaiser, anoncis sian eksiĝon el la fondita organizaĵo, kaj el la Esperanta Civito.

- Pro la nekompreneblaj okazaĵoj rilate la fondon de FEM mi nun finfine definitive forlasas tiun organizon, ĉar mi ne estas obeema servistino por iuj homoj, kiuj eĉ ne pretas respondi miajn plej simplajn demandojn. Laŭ mia opinio estas skandalo kiel FEM-respondeculoj je niaj simplaj demandoj reagas, anoncis Dorothea Kaiser en la retlisto Femino. La lasta guto por ŝi estis evidente la fakto, ke la ĉeestintoj de la fonda kunsido en La Chaux-de-Fonds rifuzis informi ŝin, kio efektive okazis en la kunsido.

- Ĝuste tion ni ne volis havi, ke  FEM fariĝu glorigilo de iu organizo. Ni sciis tre bone, kial ni celis sendependan organizon. Ke mi eĉ nun ne scias, ĉu mi estas membro de la komitato de FEM, rabas al mi la lastajn iluziojn pri tio, ĉu FEM estas sendependa aŭ ne. Por kio tiu sekretemo estu bona? Se ne por la Esperanto-Civito? ŝi miris en la diskut-listo Femino, kiun ŝi fondis.

Por la aliĝo de FEM al la Esperanta Civito argumentis Giorgio Silfer mem en la sama listo en junio. Laŭ li, la Civito ne postkuras inojn, sed la inoj postkuru la Civiton:

- Iuj povus preskau timi, ke FEM fariĝos terure forta lobio, kiu akiros amason da avantaĝoj el la Esperanta Civito, ĉar FEM nuntempe enhavas duonon de la Senato, kun virinoj el ĉiuj tri parlamentaj grupoj. Tial ne kredu ke la Civito postkuros FEM-on (ĝi postkuras ja neniun): devus esti FEM, kiu tuj kaptas la ŝancon, kaj petas la aliĝon al la Pakto, opiniis la ĉefa korifeo de la Pakto.

Efektive FEM tuj kaptis la "ŝancon", kvankam en la retlisto Femino oni forte argumentis kontraŭ la aliĝo de FEM al iu ajn organizaĵo.  Aliĝinta "establo" laŭ punkto 10 de la fonda dokumento ne plu rajtas forlasi la  Pakton sen aparta permeso de la Civito.

- La ekesto de FEM estas modelo por tio, kiel oni devas fondi organizon, se oni tute nedemokrate volas sekurigi la potencon antaŭ ol iu membro en la organizo povas reagi je io. Unue oni ŝajnigas kunlaboremon kun tiuj homoj, kiuj volas fari ion en la feminisma kampo, poste oni lerte izolas tiujn homojn per tio, ke oni flankenŝovas ilin iom post iom, opinias Hans Georg Kaiser.

La diskuto pri la fondo de feminisma organizaĵo estis komencita jam printempe en la retlisto Femino, kiun fondis Dorothea Kaiser, kaj ŝi estis unu el la provizoraj kunordigantoj de la fondota asocio. Ŝi tamen ne povis ĉeesti la fondan kunsidon de la asocio, kaj tial estis facile por la ĉefaj civitanoj elekti aliajn, pli taŭgajn personojn por la gvidaj postenoj kaj zorgi, ke la nova organizaĵo tuj petu aliĝon en la Esperanta Civito - paŝo kiu sendube certigos, ke la plej multaj esperantistoj tre hezitos proksimiĝi al la nova organizaĵo.

- Oni disdonas fakte hejme en sia entrepreno la postenojn inter si, en la kazo de FEM inter la dungitoj en Ĉaŭdefono, poste oni sekurigas la plenan potencon pri la organoj (Femina) kaj poste, se ĉio tio estas farita, oni informos la membrojn pri tio, kio estas la organizo. Eĉ antaŭ ol iu membro povas diri ion, jam la "redakcio" (kiu komplete konsistas el obeeemaj civitanoj) decidas, kiuj informoj iru al la publiko kaj kiuj ne, komentas Hans-Georg Kaiser.

La ĉeestintoj rifuzis komenti la okazintaĵojn alimaniere ol per "Heroldo Komunikas", gazetara komuniko de la Civito. La komuniko ne malkaŝas kiom da personoj ĉeestis la fondan kunsidon, sed inter la linioj eblas legi, ke ili estis malpli ol dek, eĉ se oni kalkulas ankaŭ la observantojn. La protokolo de la kunsido kaj aliaj informoj pri ĝi estis deklaritaj sekretaj.

- Ĉiuj FEM-anoj scias, ke la protokoloj estas konfidencaj, sekve ne cirkuligeblaj ekster la oficiala retlisto de FEM, deklaris Anna Lászay, kiu estis elektita unu el la tri komitatanoj de la nova organizaĵo. Lászay estas la redaktoro de Heroldo Komunikas, la reta dissendolisto tra kiu estas dissendataj la oficialaj informoj de la Esperanta Civito.

En Heroldo Komunikas Anna Lászay proponis sendi la statuton de la nova organizaĵo al ĉiuj interesiĝantoj. Al Libera Folio ŝi tamen ne volas sendi ĝin:

- Skandalgazetistoj kaj mensogantoj ricevas informojn nur post seriozaj ĵurnalistoj kaj sinceraj interesiĝantoj. Vi do estas en la lasta vico, ŝi respondis al ni.

La aliaj du komitatanoj krom Anna Lászay estas Alga Guernieri, kiu interalie funckiis kiel "matrikulisto" ĉe la Civito, kaj Marie-France Conde Rey, kiu estas unu el la  redaktoroj de Heroldo de Esperanto, revuo nuntempe plene regata de la Esperanta Civito. Kiel prezidanto de Feminisma Esperanto-Movado estis elektita ĝuste Marie-France Conde Rey.

La fonda kunsido de la nova civitana movado decidis ankaŭ pri eldonado de nova feminisma revuo kun la nomo Femina. Kiel redaktoro de la revuo estis elektita Agneta Emmanuelsson, same membro de la Esperanta Civito. Tamen ne estas klare, en kiu formo estos eldonata la revuo, kaj kiel ĝi estos financata.

Samtempe kun la fondo de la nova civitana asocio, ankau UEA klopodas aktivigi sian Komisionon pri Virina Agado. Ekfunkciis la retlisto de la komisiono, kiu dum longa tempo dormis. Tamen ankoraŭ malmultas ĝiaj membroj.

Dum la Kultura Esperanto-Semajno de la Esperanta Civito en La Chaux-de-Fonds okazis ankaŭ festado de la nova nacia tago de Esperantio - ĝin oni celebris vespere en mardo, la 10-a de aŭgusto, per bankedo honore al la Tago de la Pakto.