Polaj esperantistoj en Nepalo liberigitaj
Marzena Staniszewska, Wojciech Mysiara.
La novaĵ-agentejo Associated Press pasintsemajne raportis, ke kvar poloj kun rilato al Nepala Esperanto-Asocio estis kaptitaj de maŭistoj. Du el la kaptitaj poloj devenas el Toruń. Ili jam delonge vojaĝadas tra la mondo - informis siavice la pola novaĵ-agentejo PAP, kiu citis informojn "el la medio de polaj esperantistoj".
Kiel informis Teresa Nemere, instruisto de Esperanto en Studumo de Fremdaj Lingvoj ĉe Nikolao Kopernik-Universitato en Toruń, du el la forkaptitoj estis Marzena Staniszewska kaj Wojciech Mysiara, kiuj vojaĝas tra la mondo, uzante esperantistajn kontaktojn. Ili estas studintoj de la Toruna Universitato.
Kun ili veturas du aliaj poloj, Konrad Kakolewski kaj Maria Los, kiuj ŝajne ne estas esperantistoj.
En lundo la 27-a de aprilo Wojciech Mysiara telefonparolis kun raportisto de la novaĵ-agentejo Reuters kaj konfirmis ke ĉiuj kvar poloj estis liberigitaj.
- Sep aŭ ok ribeluloj haltigis nin en la vilaĝo Bhandara kaj petis de ni monkontribuon. Ili portis pafilojn kaj mangrenadojn. Ili diris ke ni ne rajtos pluiri, se ni ne pagos, li diris.
La vojaĝantoj rifuzis pagi, kaj estis devigitaj dormi en la vilaĝo. Laŭ la vortoj de Wojciech Mysiara ili tre timis. En la sekva tago ili konsentis pagi 20 000 nepalajn rupiojn (280 usonajn dolarojn) kaj rajtis pluiri.
La vilaĝo Bhandara situas proksimume cent kilometrojn okcidente de Katmanduo, duonvoje al Lukla.
La nepalaj maŭismaj ribeluloj estas multnombraj en la regiono de Lukla, sed ilia oficiala politiko estas ne malutili al turistoj, kiuj donas gravajn enspezojn al la malriĉa regiono. Tamen la maŭistoj kutimas kolekti "imposton" de la turistoj.
- La retejo de Marzena Staniszewska kaj Wojciech Mysiara
Pro informo de AP Esperanto (kutime en la formo de "poloj ligitaj al Nepala Esperanto-Ligo) aperis kiel cxefnovajxo en cxiuj gravaj amaskomunikiloj matene. Jen...! MW