EU-reguloj nuligas Civitan "establon" en Svedio

La aliĝo de la manĝejo Bon' Apetit' al la Esperanta Civito okazis per decido de la ĉefa respondeculo Lennart Svensson, kiu laŭ siaj propraj vortoj mem ne bone regas Esperanton. Al Libera Folio li rakontis, ke li aligis sian manĝejon al la Civito ĉefe pro scivolo, por ekscii pri kio temas la tuta afero. La praktika signifo de la aliĝo konsistis en tio, ke Agneta Emanuelsson el Svedio povis reprezenti la manĝejon en la decid-organoj de la Esperanta Civito.

Multaj esperantistoj en Svedio esprimis malkontenton pri la ŝajna ligo inter Esperantogården en Lesjöfors kaj la Espеranta Civito. La plendoj plioftiĝis pasintjare, kiam iĝis konate, ke Valerio Ari (alinome Giorgio Silfer) devis gvidi "Skandinavian Esperantologian Seminarion" en Lesjöfors. Nur tri personoj aliĝis al la seminario, kaj la aranĝo fine estis nuligita pro manko de interesiĝo.

La 1-an de marto pro manko de interesiĝo kaj finance pezaj EU-reguloj estos nuligita ankaŭ la tuta manĝejo Bon' Apetit'. Pri tio informas svedlingva komuniko, dissendita la de la Esperanto-domo la 21-an de februaro:

La kialo de la nuligo estas decidoj faritaj en Bruselo. Iĝas maleble havi entreprenon kun manĝoservado en maldense loĝata regiono pro la pago kiun la municipoj devas postuli por sia laboro. Laŭ la direktivoj el Bruselo ĉiu manĝejo devas mem pagi la tutan koston de la higiena kontrolo kiun postulas la leĝo. Tio kaŭzas grandajn kostojn kiuj igus la manĝoprezojn neеlteneblaj por la gastoj.

Kvankam la manĝejo estos nuligita, la kuirejo de la Esperanto-domo plu ekzistos, kaj organizaĵoj kiuj lokas siajn aranĝojn en la Esperanto-domo povos mem prepari manĝon por la partoprenantoj. La ĉefa ŝanĝo post la nuligo de Bon' Apetit' estos, ke malgrandaj grupoj de hazardaj gastoj ne plu povos mendi pretan manĝon, kaj la Esperanta Civito ne plu havos "establon" en norda Eŭropo.