Ĉinio serĉas subtenon de esperantistoj

La redakcio de El Popola Ĉinio, kiu nuntempe estas ne papera periodaĵo, sed unu el la oficialaj esperantlingvaj retejoj de Ĉinio, la 14-an de aprilo dissendis leteron al multaj diverslandaj esperantistoj, kiuj pro diversaj kialoj pli frue havis kontakton kun la retejo. En la mesaĝo la ĉinaj ŝtate dungitaj esperantistoj esprimas sian konsternon pro la protestoj, kiujn renkontis la stafeto de la olimpika torĉo en Eŭropo:

Dum stafetado en Britio kaj Francio, iuj secesiaj fortoj de Tibeto intencis malhelpi ĝin. Ili eĉ rabis la torĉon de handikapulo-torĉo-portantino.Tio kaŭzis nian penson pri la serioza perforta evento okazinta la 14-an de marto en Lhasa de Tibeto, en kiu 18 senkulpaj civitanoj estis mortigitaj, 382 vunditaj, kaj 58 el ili serioze vunditaj. Krome, unu policano estis mortigita, 241 vunditaj, kaj 23 el tiuj serioze vunditaj. Ĉio ĉi estis instigita de la kliko de Dalai-Lamao kun celo "sendependiĝo de Tibeto".

Ne klaras, de kie venas la informoj, laŭ kiuj Dalai-Lamao "instigus" la perfortaĵojn okazintajn en Tibeto, aŭ ke li postulus sendependiĝon de Tibeto. La nuna Dalai-Lamao antaŭ multaj jaroj rezignis pri la postulo, ke Tibeto iĝu tute sendependa de Ĉinio.

Liaj ĉefaj postuloj estas, ke la tibeta registaro estu memstara kaj demokratia, kaj ke la religia libereco estu efektiva, sed li konsentas, ke Tibeto restu parto de Ĉinio, kvankam multaj tibetanoj en ekzilo kritikis lin pro tiu pozicio. Li ricevis la Nobel-premion pri paco en 1991 pro sia daŭra senperforta lukto por la aŭtonomeco de Tibeto.

La ĉinaj oficialaj amaskomunikiloj tamen ĉiamaniere disvastigas malfavorajn asertojn pri Dalai-Lamao. Aparte absurde aspektas, kiam la oficiale ateisma, komunisma reĝimo kulpigas Dalai-Lamaon pri "ĝenado de animmigrado". Tiaj asertoj aperas ankaŭ en la oficialaj esperantlingvaj retejoj de Ĉinio:

De la 1980-aj jaroj kiam restariĝis la sistemo de animmigrado de viva budho de la tibeta budaismo, Dalai-kliko neniam ĉesas ĝenadon kaj subfosadon al la animmigrado.

Lige kun la maltrankvilaĵoj en Tibeto en marto, eksterlandaj ĵurnalistoj estis forpelitaj el la regiono, por ke ili ne vidu, kio okazas. Poste la ĉinaj oficialaj amaskomunikiloj forte kritikis eksterlandajn amaskomunikilojn, kiuj laŭ la ĉinoj "ne rakontis la veron" pri la okazaĵoj.  Fine de marto malgranda grupo de eksterlandaj ĵurnalistoj estis enlasita en Tibeton, sed la ĉinaj aŭtoritatoj forte reguligis, kion ili rajtis vidi kaj kun kiuj paroli.

Nun la oficialaj esperantlingvaj retejoj de Ĉinio ne nur provas disvastigi la oficialan ĉinan version de la okazaĵoj, sed ankaŭ enketas ĉe diverslandaj esperantistoj, kiel la amaskomunikiloj en iliaj landoj raportis pri Tibeto, kaj kion ili mem opinias:

Ankaŭ ni faris raporton pri la evento en nia reta EPĈ. Nun ni volas scii, kiel raportis viaj lokaj ĵurnaloj pri stafetado de olimpika torĉo kaj evento okazinta en Lhasa. Kiaj estas viaj opinioj?

Unu el la esperantistoj, kiuj respondis al la letero de El Popola Ĉinio, estis Steven Brewer el Usono. Kopion de sia letero li sendis al Libera Folio. Li skribis interalie:

Se Ĉinio ne donas al siaj civitanoj la rajton libere esprimi sin kaj la rajton ekscii tion, kio vere okazas en Tibeto, mi subtenas la pacan manifestadon pri tio, eĉ ĉe la stafetado de la olimpika torĉo.  En Ĉinio eble oni povas malpermesi la liberan esprimon de la popolo, sed ankoraŭ ne ĉie en la mondo.

Kredeble tamen la redaktoroj de la oficialaj ĉinaj retejoj elektos aliajn reagojn por publikigo.