Monkolekto por reta PIV nur duonvoje

Libera Folio: Laŭ la informoj en via retejo, oni ankoraŭ ne atingis duonon de la bezonata sumo. Ĉu la kvanto de donacoj stagnas?

Jevgenij Gaus: Donacoj venas regule kaj konstante, sed bedaŭrinde malrapide. Tamen ni esperas iom post  iom kolekti sufiĉan sumon. Ni daŭre pensas, ke ni povos kolekti  10.000 EUR, sed simple tio okupos pli da tempo ol ni imagis.

Libera Folio: Kion vi do faras, ĉu vi nur atendas, ke la mono amasiĝu?

Jevgenij Gaus: Nuntempe ni  troviĝas en la planfazo, ni pripensas la plej bonajn manierojn por  ciferecigo, ellaboras la datumbazajn strukturojn kaj provas antaŭvidi ĉiujn eblajn malfacilaĵojn. Reale labori ni komencos kiam ni kolektos almenaŭ  60-70% de la sumo, ĉar ni ja devas pagi homojn kaj ne povas ĉiam fari tion  el nia propra poŝo. Nia revo estis funkciigi ĉion ĝis la UK, sed se homoj same  pasive donacos, nia revo riskas ne realiĝi.

Libera Folio: Kaj se oni ne atingos 10.000, ĉu do tute ne aperos reta PIV? Ĉu oni resendos la monon tiukaze? Aŭ ĉu ekzistas alternativa plano, unue aperigi pli simplan version, por kiu sufiĉos malpli da mono?

Jevgenij Gaus: Aperigo de simpla versio apenaŭ estas vere simpla. Eĉ nura ciferecigo de  PIV estas sufiĉe granda defio. Ja ni ne simple skanos la libron, ni volas  produkti servon, kiu garantiite bone funkcios estonte. Ja same kreante  lernu! ni ne simple skanis iun lernolibron. Unu el la interkonsentoj kun SAT  estas, ke ekzistu la eblo poste el la elektronika versio facile generi la  paperan. Do oni administros la vortaron per la reto kaj poste en ajna  momento volas havi la eblon generi preseblan version de ĝi.

Libera Folio: Kion tio signifas en la praktiko?

Jevgenij Gaus: Tio signifas, ke  dum ciferecigo ni devas konservi ĉiujn eblajn informojn pri la aranĝo de la  teksto: vortojn, difinojn, klarigojn, vortkombinojn, ekzemplojn, internajn ligilojn  inter sinonimoj, bildojn kaj rilatajn informojn, ekz. koordinatojn de  vort-klarigoj por ilustraĵoj ktp. Grandan problemon kaŭzas ankaŭ tio, ke PIV  ĝis nun estis farata en tre malnova programo, el kiu ne eblas facile elpreni  la bezonatajn informojn. Ni devos krei saĝan analizilon, kiu kapablos  elpreni kaj analizi la datumojn. La datumoj mem ofte ne havas la saman aranĝon, tio signifas, ke tute aŭtomate la afero ne povos funkcii kaj  bezonatos atenta provlego de la tuto, kaj ankaŭ tio postulos homfortojn. Se  aldoni al tio kreon de la aspekto, programadon de la uzant-interfaco,  testado de la projekto, tio jam signifos laboron de kelkaj personoj dum kelkaj monatoj.

Libera Folio: Tamen, dek mil eŭroj estas tre multe da mono. Ĉu vere ne eblas fari malpli koste?

Jevgenij Gaus: Ni legas de tempo al tempo rimarkojn pri la granda sumo de la projekto. Sed  ŝajne kutime tiuj rimarkoj venas de homoj, kiuj apenaŭ komprenas, kiel  funkcias la aferoj. Se vi laboras profesie pri io kaj enspezas per tio, vi  ja havas multajn elspezojn: vi devas pagi diversajn asekurojn, impostojn, vi  havas ankaŭ oficejajn elspezojn, administrajn kostojn ktp. Jam tio ofte signifas 30-50% de la tuta sumo. Kaj de la cetera sumo oni devas pagi  programistojn, aspektigistojn kaj administrantojn. Verŝajne ne indas skribi,  kiom altaj salajroj de programistoj povas esti.

Libera Folio: Eblus ja uzi volontulajn fortojn, ĉu ne?

Jevgenij Gaus: Kompreneble oni alkutimiĝis,  ke en Esperantujo oni devas fari ĉion volontule, sed tio ne estas la stilo  de E@I (almenaŭ ne povas esti ĉe ĉiuj projektoj, tiom da libera tempo ni  vere ne havas). Kreado de bonaj projektoj ne estas nur nia ŝatokupo, tio  estas ĉefe nia profesio, kaj ni provas fari nian laboron profesie.  Aldone, subtenante iun nian projekton, oni subtenas ne nur tiun projekton, sed ĝenerale la tutan agadon de E@I. Dank' al tio E@I daŭre povos ekzisti  kaj produkti multajn novajn projektojn. 10.000 EUR por tia projekto kiel reta  PIV ne estas multe, verdire la vera kaj plena kosto estos pli granda, sed ni  esperis financi la ceteron per postaj donacoj, propraj investoj aŭ vendoj de  elŝuteblaj versioj, kaj de Esperantistoj ni petis pli modestan sumon, ĉar ni  ja scias, kiel oni kutime reagas al tiaj sumoj kaj ni ne volis ŝoki homojn.   

Libera Folio: Tamen, ĉu ne SAT donis al vi la enhavon senpage?

Jevgenij Gaus: Ankaŭ ni vidis komentojn de homoj, kiuj ial decidis, ke SAT liberigis la  tutan enhavon. Tio ne estas vero. La tuta enhavo de la vortaro apartenos al  SAT same kiel ĝis nun. SAT planas daŭre prizorgi kaj flegi la tutan enhavon,  E@I simple aldonos la eblon facile administri la tuton kaj la eblon al  ajna persono rete konsulti la vortaron kaj kontribui al la vortaro pere de  diskutoj, komentoj kaj rimarkoj.