Kniivilä gajnas finnan premion
UEA en UN-kunsido pri indiĝenaj popoloj
Inter la 9-a kaj 13-a de julio okazis ĉe Unuiĝintaj Nacioj en Ĝenevo la 5-a sesio de la fakula kunsido traktanta la tutmondan situacion koncerne rajtojn de indiĝenoj, "Ekspertaj Mekanismoj pri la Rajtoj de Indiĝenaj Popoloj (EMRIP)". Reprezentantoj de UEA Verena Graf, Cesco Reale kaj Stefano Keller partoprenis la eventon, kiun ĉeestis delegitoj de indiĝenaj popoloj el ĉiu kontinento kaj membroj de NRO-oj defendantaj indiĝenojn. La rezultoj de la EMRIP-kunsido, kiu okazas unufoje ĉiujare, estos plutraktataj de la Homrajta Konsilio de UN.
Plia instruisto de Esperanto subvenciota de EU
Eŭropa Unio subtenos la restadon plia instruisto de Esperanto Mazara del Vallo en Italio. Laŭ informo de Itala Esperanto-Federacio kaj de la entrepreno Kosmo, esperantisto el Francio ricevos stipendion por translokiĝi al Mazara kaj kunlabori kun la tieaj agadoj de IEF dum kvin semajnoj, aŭtune de 2012.
Akademio de Esperanto trovas frua decidi
La Akademio de Esperanto, 125 jarojn post la publikigo de Unua Libro, opinias ke la lingvouzo ankoraŭ ne decidis, ĉu resti kun leono estas danĝera, aŭ tamen danĝere. Tiun konkludon de la Sekcio pri Gramatiko diskonigas la 13-a Oficiala Informo de la Akademio, dissendita en la reto en vendredo la 13-a de julio.
EAB ricevos la premion Cigno
Esperanto-Asocio de Britio ricevos la unuan novformatan Premion Cigno, kiun Fondaĵo Cigno, starigita de Etsuo Miyoshi, aljuĝas al la landa asocio de UEA kiu dum la lasta jaro plej sukcese informis la eksteran publikon pri Esperanto.
John Wells trafita de apopleksio
La konata lingvisto kaj esperantisto John Wells estis trafita de apopleksio dum promeno en merkredo, kaj nun estas flegata en malsanulejo. Komuniko pri tio aperis en lia paĝo en Facebook ĵaŭde antaŭtagmeze.
Esperantistoj aktivas en Rio+20
La fama urbo Rio-de-Ĵanejro en Brazilo gastigas la Konferencon de Unuiĝintaj Nacioj pri Daŭripova Evoluo, Rio+20, okazantan de la 13-a ĝis la 22-a de junio. Ŝtatestroj kaj aliaj politikistoj el 193 membroŝtatoj de UN kaj reprezentantoj de la civila socio kunvenas en la kongresejo Riocentro. La nomo Rio+20 referencas al la unua tia konferenco en Rio-de-Ĵanejro en 1992.
Universala Kongreso 2014 okazos en Bonaero
La 99-a Universala Kongreso de Esperanto en la jaro 2014 okazos en Bonaero, la ĉefurbo de Argentino. La Estraro de UEA elektis la ĉefurbon el inter tri argentinaj urboj, kun kies organizaj kondiĉoj la Konstanta Kongresa Sekretario Clay Magalhães antaŭe konatiĝis surloke.
Urbaj bicikloj en Varsovio havos Esperantan nomon
"Veturilo" estos la nomo de la novaj urbaj bicikloj en Varsovio, laŭ decido de interreta voĉdonado. La Esperanta nomo gajnis spite la fakton ke ĝi enhavas la literon "v", kiu ne estas uzata en la pola.
Libera Folio refunkcias post diskopaneo en servilo
Post plurtaga foresto el la reto, en merkredo ekrefunkciis Libera Folio. La paneo estis kaŭzita de rompita disko en servilo. Aldone misfunkciis programaro, kiu devis aŭtomate uzi plurajn diskojn por provizi la servilon per spaco. Ni petis la teknikan respondeculon de Libera Folio, Jan Ulrich Hasecke, klarigi kio okazis.
Demisiis la ĝenerala sekretario de TEJO
Nur unu monaton post la demisio de la kasisto, la estraro de TEJO perdis plian membron. Demisiis la ĝenerala sekretario Paulína Kožuchová. Ŝian lokon provizore okupos Paweł Fischer-Kotowski, ĝisnuna komitatano A por PEJ kaj komisiito pri ŝanĝoj de regularo kaj reglamentoj. La prezidanto de TEJO, Łukasz Żebrowski, komentas la demision, respondante al demandoj de Libera Folio.
85 vizitantoj festis la 50-jariĝon de UEA en Nieuwe Binnenweg
Ulrich Lins estis la ĉefa preleganto en la 36-a Malferma Tago de la Centra Oficejo de UEA sabaton, la 28-an de aprilo. La aranĝo allogis 85 vizitantojn kaj okazis precize 50 jarojn post la translokiĝo de la oficejo al la domo ĉe Nieuwe Binnenweg 176. D-ro Lins, kiu vizitas la UEA-domon jam de pli ol kvar jardekoj, prelegis dufoje pri personoj, kiujn li renkontis dum siaj vizitoj, kaj pri movadaj eventoj, ligitaj al la CO dum tiu periodo.
32 membroj voĉdonis en TEJO-elektoj
Nur 32 voĉdoniloj revenis al la Centra Oficejo, kiam ĉiuj individuaj membroj de Tutmonda Esperantista Organizo (TEJO) rajtis baloti en la elekto de novaj komitatanoj B. Entute la asocio havis 253 pagintajn membrojn je la fino de la balota proceduro, en aprilo. Nur 13 procentoj el la pagintaj membroj do trovis la aferon inda je la kosto de poŝtmarko.
Heroldo parte ĉesis malaperi
Post plurmonata paŭzo denove aperis du numeroj de Heroldo de Esperanto.
TEJO perdis sian kasiston
Ok monatojn post sia elektiĝo demisiis la kasisto de Tutmonda Esperantista Junulara Organizo (TEJO), Alisa Nikitina. Pro personaj kialoj ŝi tute lasis la estraron de la asocio. Provizore la kasistajn taskojn transprenis Nico Huurman, estrarano pri aktivula trejnado. La ŝrumpinta estraro ne plu povos senprobleme prizorgi ĉiujn bezonatajn taskojn, kaj TEJO tial urĝe serĉas novan aktivulon kiu povos transpreni, kiel eksterestrara komisiito, parton de la taskaro. La subita krizo estos grava temo dum la estrarkunsido de TEJO, kiu komenciĝos en Varsovio en malbonaŭgura tago - vendrede la 13-an de aprilo.
Intervjuo kun la redaktoro de Libera Folio en Kontakto
En la unua numero de la revuo Kontakto por 2012 aperis intervjuo kun Kalle Kniivilä, la redaktoro de Libera Folio. Kontakto estas rete alirebla nur por abonantoj, sed sojle al la apero de la sekva numero la redaktoro de Kontakto afable permesis, ke la teksto de la intervjuo aperu en la reto.
Eŭropa Komisiono pritraktos himnon en Esperanto
Je la monatŝanĝo ekfunkciis la mekanismo de la Eŭropa Civitana Iniciato, nova proceduro de la Eŭropa Unio, per kiu peticio por nova leĝo, subskribita de unu miliono da EU-civitanoj, devos esti formale pritraktita de la Eŭropa Komisiono. Plej rapide agis la aktivuloj de Eŭropa Esperanto-Unio, kiuj jam kolektis la bezonatajn subskribojn en sep landoj. La iniciato de EEU proponas enkonduki devigan kantadon de la eŭropa himno en latino kaj Esperanto en ĉiuj lernejoj de la unio.
Forpasis Josi Ŝemer
Forpasis la konata israela esperantisto Josi Shemer.
Stano Marček redaktos la revuon de UEA ĝis la pensio
Stano Marček, kiu redaktas la revuon de Universala Esperanto-Asocio ekde januaro 2002, antaŭvideble restos ĉe la redaktora posteno ĝis sia pensiiĝo. Ĉar UEA jam dum dek jaroj regule renovigadis la unujaran kontrakton kun redaktoro, la kontrakto nun definitiviĝis, kaj ne povas esti unuflanke nuligita. Tio evidentiĝis, kiam respondeculoj de UEA kontaktis nederlandan juriston por certiĝi, kies interpreto pri la kontrakto validas.
Policanoj de Esperanto proponas ŝvabrilon en pugon
La vorto "Esperanto" ekhavis malagrablan kromguston en Rusio post novaj malkovroj pri polica perforto. Pasintsemajne arestito en la urbo Kazan mortis pro krevo de rektumo, post kiam policanoj torturis lin, ŝovante ĉampanbotelon en lian pugon. La okazaĵo klare montris la fiaskon de la polica reformo, entreprenita de prezidento Dmitrij Medvedev. Por konvinki la publikon ke temis pri escepta okazaĵo, la aŭtoritatoj decidis tute malfondi la policejon Dalnij, kie okazis la skandala perfortaĵo. Tamen baldaŭ oni malkovris similajn okazaĵojn en du pliaj policejoj de Kazan. Unu el tiuj estas la policejo Esperanto, tiel nomata ĉar ĝi situas en la Esperanto-strato. Ni publikigas eltiraĵon el la reta gazeto Gazeta.ru pri la okazaĵoj kiuj nun disfamigas la vorton Esperanto en Rusio.
Heroldo ĉesis aperi
Ŝajne ĉesis aperi Heroldo de Esperanto, kiu iam estis unu el la ĉefaj gazetoj de la Esperanto-movado. La lasta numero laŭ la regula vicordo estas numero 10 por la pasinta jaro. Poste sekvis truo de tri numeroj, ĉar la sekva aperinta numero estis numero 14 por 2011. La lastaj tri pasintjaraj numeroj ne aperis, same ne aperis iu ajn numero de la jaro 2012, kiuj devus jam esti tri aŭ kvar.
