Ĉu SAT havas tro da membroj?

Mi ĉijare deziris aliĝi al SAT (Sennacieca Asocio Tutmonda), sed ŝajne tio ne estas facila tasko. La 6an de oktobro mi ricevis mesaĝon de Jakvo Schram: "la P.K. (plenum-komitatato) ne povas akcepti vin kiel membro de SAT. Mi esperas ke vi povos plibonigi vian rilaton kun X por ke ni povu rekonsideri nian decidon." X estas membro de SAT, kiu skribis leteron al Jakvo petante ke ili ne akceptu mian aliĝon. Mi ne scias tion kion X skribis pri mi ĉar mi ne ricevis kopion de la letero. Do mi ne povis vere defendi min. Mi ne povis kontroli ĉu ŝi enmetis malverajn faktojn. Jakvo ja demandis min kial laŭ mi X havas negativan opinion pri mi. Jakvo kaj la aliaj konsideras X kiel fidindan personon. X ial malŝatas min kaj deziras malpermesi al mi esti membro. Ĉu vere persono kun tiaj sentoj povas esti persono kiu objektive priskribos min? Mi ege dubas, sed ŝajne la plenumkomitato havas neniajn dubojn kaj pretas fari decidon surbaze de la vortoj de tiu unu persono. Neniu el la membroj de la plenumkomitato konas min, sed tamen neniu el ili krom Jakvo (vidu supre) faris al mi eĉ unu demandon por havi pli da informoj pri la problemo. Ili ne konas min sed tamen kontentas fari decidon pri ĉu mi rajtu fariĝi membro. Mi tre deziras plibonigi mian rilaton kun X kaj skribis al ŝi ke mi volonte pretus aŭskulti ŝin, ke ŝi ja povus klarigi al mi kial ŝi tiom malkontentas. Mi plurfoje provis pardonpeti al ŝi se mi iam ĝenis ŝin, sed ŝi ignoras ĉiujn el miaj klopodoj. Post la rifuzo de mia aliĝo mi decidis legi la statuton de SAT. En ĝi legeblas: 3. Povas esti aktiva membro ĉiu persono, scipovanta Esperanton, kiu, akceptinte ĉi tiun statuton, pagas la jarkotizon, ĉiujare fiksitan de la Plenum-Komitato (P.K.). Mi komprenas, ke ĉiu esperantisto rajtas fariĝi membro post akcepto de la statuto kaj pago. Sed ŝajne tiel ne funkcias SAT. La plenumkomitato rajtas juĝi esperantistojn kaj decidi ĉu akcepti ilin kiel novajn membrojn aŭ ne. Mi petis ricevi almenaŭ kialojn pro la rifuzo de mia aliĝo. Neniu el la 6 membroj de la plenumkomitato konsideris ke necesas doni al mi kialon kial ili subtenis tian decidon kaj tute ignoris mian peton de klarigoj. Tamen Jakvo ja donis kialon. Li skribis: "Mi ne juĝas, mi aŭskultis al rakontoj de du personoj. Kiu mensogas, kiu diras veron, kiu troigas mi ne povas diri. Fakte la elekto estas nur kaj nur ĉar X estas dum multegaj jaroj membro de SAT kaj P.K. ne volas perdi ŝin. Mi ne kontrolis pri vero de rakonto de X nek pri via rakonto. Se montriĝas ke vi diras la veron kaj X mensogas, eĉ tiam mi ne scias kion P.K. decidas. Ĉu elekti novan membron, kiu eble post unu du jaroj denove forlasas SAT aŭ elekti por tiu kiu jam dekoj da jaroj estas sindona membro". Ĉu vi ne trovas tiun respondon tre interesa? Jakvo ne interesiĝas pri kie estas la vero, li nur deziras ne perdi X kiel membron. Ŝajne X minacis malmembriĝi se mi fariĝas membro kaj do tial mia aliĝo estis rifuzita. Ĉu decas devigi la plenumkomitaton elekti inter ŝi kaj mi? Tamen la plenumkomitato havas respondecon kaj mi pensas, ke ili ege malbone pritraktis la problemon. Jakvo skribis: "La Plenum Komitato prenis decidon kiu laŭ la komitatanoj estas bona decido laŭ informo kiun ni havas". Mi neniam kritikis SAT. Mi mem partoprenis en du SAT kongresoj antaŭ multaj jaroj. Mi estas esperantistino ekde la aĝo de 6. Kvar generacioj en mia familio scipovas paroli Esperanton. Mi estas la unua en Australio kiu ricevis de la sidneja Universitato de Novsudkimrujo instrudiplomon specife por Esperanto. Mi ĵus estis reelektita vic-prezidanto de la Novsudkimruja Esperanto Federacio. Mi kreis plurajn retejojn, ekzemple www.worldlanguage.info kaj www.esperantoensidnejo.weebly.com Mi verkis libron pri lingvoj en la angla lingvo "Foreign languages: what they don't often tell you" http://members.iinet.net.au/~nicolee/bookad.html ... sed mi ne rajtas fariĝi membro de SAT. Mi petis la permeson aliĝi almenaŭ provizore al la diskutgrupo SAT-diskuto kiu estas por membroj de SAT, ĉar mi konsideris ke la problemo de mia aliĝo koncernas SAT, sed Vito Markovo respondis: "Vi ne ricevos permeson aliĝi al tiu diskut-grupo dum vi ne estos membro" Li aldonis kelkajn komentojn, ekzemple: "Ŝajnas al mi tute normale ke SAT fidas siajn membrojn pli ol nekonatojn" Ĉar mi ne rajtas esprimi min ene de SAT, mi do elektis tiun ĉi retejon por esprimi min. Konklude mi kritikas la manieron laŭ kiu la plenumkomitato de SAT juĝas ĉu iu rajtas esti membro de SAT aŭ ne. Ne temas pri ĝenerala kritiko de SAT, nur kritiko kiel la nunaj komitatanoj faras decidojn koncerne la akcepton de novaj membroj. Do bonvolu ne diri al mi, ke mi estas kontraŭ SAT. Mia celo estas ke la plenumkomitato ŝanĝu sian manieron prijuĝi eblajn novajn membrojn aŭ eble aŭtomate akceptu ilin. Amike, Nicole Else, Sidnejo (Aŭstralio) Se vi deziras komenti, klaku sur la blua butono ĉi-sube "komenti".