Kniivilä gajnas finnan premion
Esperantista etoso en naziisma kastelo
Internacia Seminario estas granda junulara renkontiĝo, ĉiujare organizata de Germana Esperanto-Junularo jam ekde la jarŝanĝo 1957-58. La temo de la unua IS estis "Kulturaj, politikaj kaj ekonomiaj demandoj de la unuiĝo de Eŭropo". La nombro de la partoprenantoj en la ĉi-jara Internacia Seminario estis ne aparte granda por IS (sume 209), sed la multflanka distra kaj nedistra programo ricevis tre bonan noton de la ĉeestintoj. La IS en Wewelsburg apud Paderborn (Germanio) estis la kvara por nia raportisto Oleg Izjumenko, sed jubilea – la 50-a – en la tuta historio de tiu ĉi tradicia esperantista novjara aranĝo. Pro tiu ĉi jubileo ĝi laŭ li estis pluraspekte rimarkinda.
Rekorda decembro por Libera Folio
Decembro 2006 iĝis absolute rekorda monato en la historio de Libera Folio. Sume dum la monato la retejo ricevis pli ol 95.000 vizitojn, kaj estis legitaj 266.000 paĝoj. Unuafoje la mezuma ĉiutaga kvanto de vizitoj superis 3.000. Parte kulpas pri la granda kvanto de vizitoj la okazaĵoj ĉe la Esperanto-redakcio de Pola Radio, kiujn Libera Folio atente sekvis. Tamen ankaŭ la ĝenerala tendenco dum la lastaj monatoj, post somera trankviliĝo, estas klare supreniranta.
Ĉiutagaj elsendoj de Pola Radio daŭros ĝis la 10-a de januaro
La elsendoj de Pola Radio en Esperanto daŭros en la nuna formo ĝis la 10-a de januaro. Tion anoncis Pola Radio kelkajn tagojn antaŭ la jarŝanĝo, kiam laŭ pli frua informo devis ĉesi la ordinaraj ĉiutagaj elsendoj. Laŭ la nuna stato de la afero, post la 10-a de januaro 2007 la esperantaj elsendoj estos disaŭdigataj nur rete. Ne estas konate, kiel ofte la novformataj elsendoj estos dissendataj.
Aŭtoro de Esperanto-vortaro premiita de la Sveda Akademio
La Sveda Akademio, kiu decidas ankaŭ pri la literatura Nobel-premio, la 20-an de decembro diskonigis, ke ĝi premias la konatan esperantiston Ebbe Vilborg per speciala premio de 50.000 svedaj kronoj (iom pli ol 5.000 eŭroj). En la motivigo de la premio estas aparte menciita lia laboro por Esperanto, sed ankaŭ liaj verkoj kun rilato al latino kaj la klasika greka lingvo. En la sama kunsido reprezentantoj de la Sveda Akademio akcentis la neceson defendi la svedan lingvon kontraŭ la angla.
Malfermita letero de Corsetti al la pola prezidento
Meze de decembro Renato Corsetti sendis al la prezidento de Pollando malfermitan leteron, en kiu li atentigis pri kontraŭjudaj sintenoj, laŭ li kontribuintaj al la nuligo de esperantlingvaj elsendoj ĉe Pola Radio. Ni publikigas la tutan tekston de la letero. UEA disvastigis la leteron en Esperanto kaj en angla versio kun enkonduko por amaskomunikiloj. Hebrea traduko de la letero estis sendita al israelaj gazetoj, la anglalingva al BBC kaj al Jerusalem Post.
La oficejo de la pola prezidento respondas al Corsetti
En novembro la prezidanto de UEA, Renato Corsetti, turnis sin al la prezidento de Pollando, Lech Kaczyński, por peti klarigojn pri la planoj nuligi la Esperanto-elsendojn de Pola radio. La 21-an de decembro Renato Corsetti ricevis respondon al sia letero. Ni publikigas la kompletan tekston de la respondo en la pola kaj en esperanta traduko.
Barbara Pietrzak kaj Gabi Kosiarska en intervjuo de Radio Vatikana
Dimanĉe la 17-an de decembro Carlo Sarandrea de la esperantlingva redakcio de Radio Vatikana telefone intervjuis la kunlaborintojn de le Esperanto-redakcio de Pola Radio, Barbara Pietrzak kaj Gabi Kosiarska. Laŭ la informoj en la intervjuo, ĝuste Gabi Kosiarska post la jarŝanĝo sola prizorgos la podkastajn esperantlingvajn ret-elsendojn el Pollando. Ni publikigas la tutan tekston de la intervjuo.
Elsendoj en Esperanto daŭros ĝis jarŝanĝo
La elsendoj de Pola Radio en Esperanto daŭros ĝis la jarŝanĝo. Tiun decidon faris la estraro de Pola Radio lastmomente, ŝajne sub la influo de la granda publika bruo en polaj amaskomunikiloj vendrede la 15-an de decembro. La decido estis farita vendrede posttagmeze, jam post la surbendigo de la supozite lasta elsendo, en kiu Barbara Pietrzak, Gabi Kosiarska, Milada Szwedo kaj Wojtek Usakiewicz emocie adiaŭis la aŭskultantojn. En sabato oni jam povis aŭdi novan elsendon, kiun gvidis Gabi Kosiarska.
Kiu sakras plej suke?
Norvega Junularo Esperantista konstatis, ke esperantistoj sakras tro malmulte. Tial la asocio nun aranĝas sakraĵ-konkurson, kaj promesas al la plej inventema sakristo kvin esperantajn muzikdiskojn.
EU-komisionano pri multlingveco aprobita
Leonard Orban el Rumanio estis la 12-an de decembro aprobita kiel nova ano de la Eŭropa Komisiono, kun respondeco pri multlingveco. Li ricevis sume 595 subtenajn voĉojn en la EU-parlamento, kun 16 kontraŭaj voĉoj kaj 29 sindetenoj. Kelkaj anoj de la EU-parlamento tamen kritikis lian taskaron, nomante ĝin ne klare difinita.
ITV kaj Ĝangalo malaperis el la reto
Dimanĉe la 10-an de decembro komplete malaperis el la reto du grandaj projektoj de Flávio Rebello: la interreta portalo Ĝangalo, kaj la reta televido ITV. Ambaŭ projektoj jam de pluraj monatoj spertas problemojn kaj la retejoj ne estas renovigataj. Nun ankaŭ la malnova enhavo ne plu estas videbla, kaj tute ne eblas aliri la retadresojn de la projektoj.
La elsendoj en Esperanto ne ĉesis
La esperantlingvaj elsendoj de la Pola Radio ne ĉesis komence de decembro, kvankam du el la tri konstantaj kunlaborantoj estas maldungitaj. En la unua elsendo post la monatŝanĝo, vendrede la 1-an de decembro, aŭdiĝis la voĉoj de Barbara Pietrzak, la estro de la redakcio, kaj Milada Szwedo.
Elsendoj de Pola Radio ĉesos la 30-an de novembro?
En la Esperanto-redakcio de la Pola Radio oni kredas, ke la elsendoj en la plej malbona kazo povos ĉesi jam post kelkaj tagoj, fine de novembro. Gabriela (Gabi) Kosiarska, ĵurnalisto ĉe la Esperanto-redakcio , nun ricevis informon ke ŝi estos maldungita. Similan informon jam kelkajn tagojn pli frue, la 14-an de novembro, ricevis Wojciech (Wojtek) Usakiewicz. Renato Corsetti vizitis la ambasadon de Pollando en Romo por esprimi sian proteston kontraŭ la planoj nuligi la elsendojn.
Renato Corsetti skribis al la prezidento de Pollando
La prezidanto de UEA, Renato Corsetti, turnis sin al la pola prezidento, Lech Kaczyński, pledante por la daŭrigo de la elsendoj en Esperanto de Pola Radio. Pli frue Renato Corsetti jam skribis al la pola ministro pri eksterlandaj aferoj kaj al la direktoro de Pola Radio. Ni publikigas ĉi-sube tradukon de la pollingva letero, sendita al Lech Kaczyński. En sia letero Renato Corsetti atentigas la polan prezidenton, ke la nuligo de la Esperanto-elsendoj povus endanĝerigi la okazigon de la Universala Kongreso en Pollando en 2009. Li ankaŭ atentigas, ke pro la juda deveno de Zamenhof, iuj povus opinii nuligon de la esperantaj elsendoj manifestiĝo de antisemitismo.
Ĵurnalisto ĉe la Pola Radio maldungita
Marde la 14-an de novembro Wojciech Usakiewicz, ĵurnalisto ĉe la Esperanto-redakcio de Pola Radio, ricevis informon ke li estos maldungita. La maldunga letero referencis al decido pri malfondo de la Esperanto-redakcio. Ankaŭ la oficiala dokumento pri la malfondo de la redakcio estis voĉlegita al li, sed malgraŭ lia peto oni ne donis ĝin al li en skriba formo, ĉar "temas pri interna dokumento de la radio". Tiun decidon la estraro de la Pola Radio laŭ la maldunga dokumento faris jam la 26-an de oktobro. Ĝis nun la decido pri la malfondo ne estis oficiale konigita al la ĵurnalistoj de la Esperanto-redakcio.
Francio protestas kontraŭ jubilea emblemo
Multlingva emblemo ne povas simboli eŭropan unuecon. Tion opinias la franca registaro, kiu esprimis oficialan proteston pri la ĵus elektita emblemo de la kvindekjara jubileo de la Eŭropa Unio. La emblemo de la jubilea jaro estis elektita post publika konkurso, al kiu estis senditaj proksimume 1.700 proponoj. La gajnintan konkursaĵon fasonis Szymon Skrzypczak el Pollando, kaj ĝi enhavas la anglajn vortojn "Tögethér since 1957", "Kune ekde 1957", kun nenormaj supersignoj kiuj supozeble simbolu diversecon. La supersignoj de la angla versio poste estis forigitaj, kaj la emblemo ricevis grafikan formon en ĉiuj nunaj kaj baldaŭaj oficialaj lingvoj de EU. Ni kreis aldone esperantan version.
Corsetti pretas minaci Pollandon
Universala Esperanto-Asocio kontaktis la polan ministron pri eksterlandaj aferoj kaj pledis por la daŭrigo de elsendoj en Esperanto. UEA krome instigas individuajn esperantistojn skribi al ambasadoj de Pollando. Laŭ Renato Corsetti, la prezidanto de UEA, minaco ne aranĝi la jubilean Universalan Kongreson 2009 en Pollando estos uzata en la intertraktadoj.
ITV paneas sed esperas baldaŭ reveni
De pluraj semajnoj ne plu videblas la elsendoj de Internacia Televido, kaj neniuj informoj pri la paneo aperas en la retejo de ITV. Multaj jam eksuspektis, ke la tuta projekto paneis, sed laŭ la direktoro de ITV, Flávio Rebello, temas pri portempa teknika problemo, kiu espereble estos forigita jam la 8-an de novembro.
UEA prepariĝas por elekto de nova estraro
Per oficiala alvoko pri kandidatoj por la elekto de komitatanoj B, en la novembra numero de la revuo Esperanto, komenciĝis la renovigo de la gvidorganoj de UEA por la trijara oficperiodo 2007-2010. La procezo kulminos en la Jokohama UK per la elekto de la Estraro de UEA fare de la nova Komitato.
Esperanto-redakcio de Pola Radio petas urĝan helpon
La nova estraro de la Pola Radio faris principan decidon nuligi la esperantlingvajn elsendojn. Lige kun tio, la estro de la Esperanto-redakcio, Barbara Pietrzak, rete dissendis alvokon al kelkaj aŭskultantoj de la programo. Ni publikigas la kompletan leteron.
