Kniivilä gajnas finnan premion
Selten pri Esperanto en la EU-parlamento
Pro la Tago de Eŭropo la 9-an de majo, dek tri nobelpremiitoj estis invititaj en la Eŭropan Parlamenton. Inter ili troviĝis la esperantisto Reinhard Selten. Li estis prezentita de la prezidanto de la Parlamento kiel esperantisto, kaj li mem levis la demandon pri lingvaj problemoj kaj pri Esperanto dum sia parolado. Laŭ li, kelkaj interesitaj EU-landoj povus komune interkonsenti pri lerneja instruado de Esperanto, kaj pliaj landoj povus aldoniĝi poste. "La lingvo estas grava parto en la evoluigo de eŭropa identeco. Nun ne ekzistas taga gazeto, kiun oni legus ĉie en Eŭropo", diris Selten. La 16-an de majo la Eŭropa Parlamento publikigis filmeton pri la vizito de la Nobel-premiitoj. La filmo ekzistas nur en la angla lingvo, kaj la plej grandan spacon ricevas anglalingvaj Nobel-premiitoj.
UEA reprezentita kontraŭvole
La 3-an de majo, tri tagojn antaŭ la elekto de la franca prezidento, reprezentantoj de tri esperantistaj organizaĵoj vizitis la stabejon de Nicolas Sarkozy, la dekstra prezident-kandidato, por diskuti lingvajn temojn. Unu el la esperantistoj estis Bertrand Hugon, kiu anoncis, ke li reprezentas Universalan Esperanto-Asocion. Poste tamen montriĝis, ke li ne ricevis la rajtigon de UEA por reprezenti la organizaĵon en politika kunteksto. "Mi mem, kvankam vicprezidanto de UEA, neniam intervenus pri grava afero sen interkonsento kun la prezidanto! Mi eĉ ne imagus, ke sen speciala mandato de la komitato aŭ de la estraro, simpla komitatano prezentus sin al ekstera instanco kiel reprezentanto de UEA", kritikis Claude Nourmont.
Ségolène Royal promesis esplori Esperanton sed malgajnis
Tuj antaŭ la decida dua voĉdonado en la elekto de la franca prezidento, Ségolène Royal decidis sekvi la ekzemplon de la nuna prezidento Jacques Chirac. Responde al letero de franca esperantisto, la maldekstra kandidato Ségolène Royal nun promesis esplori sur la plej alta nivelo la demandon pri enkonduko de Esperanto en la oficiala eduk-sistemo de Francio. Ni publikigas la tutan tekston de la letero.
Kolker transprenas la akademian konsultejon
La Akademio de Esperanto ĵus reorganizis sian konsultejon, kiun provizore, ĝis la elekto de nova direktoro, prizorgas akademiano Boris Kolker. Pli frue la konsultejon prizorgis Stefan Maul.
Esperantistoj memoris la neniigon de judoj
Esperantistoj partoprenis la oficialan memorceremonion de Holokaŭsto (neniigo de judoj dum la dua mondmilito) en la centra muzeo Jad-Vaŝem en Israelo.
La buĉinto de Esperanto-redakcio suspendita
La Inspekta Konsilantaro de Pola Radio suspendis la estraranon de la radio Jerzy Targalski. La kaŭzo de la suspendo estis, ke Targalski laŭ la la konsilantaro "ĝenis la publikan bildon de Pola Radio". Inter esperantistoj Targalski estas aparte konata pro siaj eldiroj rilate la judan devenon de Zamenhof.
UK 2009 ne okazos en Varsovio
La Universala Kongreso de Esperanto en 2009 ne okazos en Varsovio. Tion decidis la estraro de UEA en sia aprila kunsido. Restas du polaj urboj, inter kiuj elektos la nova estraro en Jokohamo.
Buller: "Decido pri publikeco publikigita pro akcidento"
En intervjuo de Pola Radio, disaŭdigita vendrede la 20-an de aprilo, la ĝenerala direktoro de UEA diris, ke la decido de la jaro 1973 pri disponebligo de estraraj protokoloj estis "akcidente" publikigita en la retejo de UEA dum periodo kiam li mem ne oficis en Roterdamo, kaj pro tio la estraro en sia aprila kunsido decidis forviŝi ĝin. En la retejo de UEA la decido troviĝis almenaŭ ekde la jaro 2003, kaj ĝi estis forigita nur post kiam kelkaj komitatanoj petis publikigon de estraraj decidoj, referencante al la decido de 1973.
Ses novaj akademianoj elektitaj
Ĉiun trian jaron unu triono el la 45 anoj de Akademio de Esperanto eliras, kaj estas elektata nova aro de Akademianoj por anstataŭi ilin. En la ĉi-jara elekto estis reelektitaj 9 membroj de la Akademio, kaj alelektitaj 6 novaj Akademianoj.
Probal Dasgupta kredeble prezidos UEA-n
Dek unu personoj kandidatas por la nova estraro de UEA, sed ĝis nun estas nur unu kandidatiĝo por la posteno de prezidanto. La nova prezidanto de UEA post Renato Corsetti kredeble do estos Probal Dasgupta el Barato. El la 11 kandidatoj ses jam estas komitatanoj, kvin kandidatas samtempe por la estraro kaj por la posteno de C-komitatanoj. Kvar el la 11 estraraj kandidatoj estas virinoj. Nur tri el la kandidatoj estas nun estraranoj. La granda kvanto de kandidatoj signifas, ke la komitato de UEA en Jokohamo havos realan elekton. Ni publikigas la resumon de la provizora raporto de la elekta komisiono, kiun la ĝenerala sekretario de UEA ĵaŭde dissendis al privataj retpoŝtaj adresoj de la komitatanoj.
La rezolucio de la Moskva konferenco publikigita.
La aranĝintoj de la internacia konferenco "Propedeŭtika rolo de Esperanto en lernado de fremdaj lingvoj", okazinta en Moskvo vendrede la 13-an de aprilo, nun dissendis la tekston de la konferenca rezolucio. En komuniko samtempe dissendita la aranĝantoj akuzas la rusian klerig-ministerion pri "atenco obstrukcii la aranĝon", ĉar la plej multaj invititaj personoj ne partoprenis ĝin. "Tio tamen ne havis sukceson, ĉar post viglaj diskutoj pri la titola problemo la ĉeestantoj unuanime akceptis rezolucion, pledantan subteni efektivigatajn en Rusio eksperimentojn celantajn riveli kaj konfirmi propedeŭtikan valoron de Esperanto kaj enkonduki la internacian lingvon Esperanto en studplanojn de rusiaj klerigejoj samrajte kun ĉiuj aliaj fremdaj lingvoj kiel propedeŭtikan rimedon antaŭ lernado de fremda lingvo", skribas Liana Tuĥvatullina en sia komuniko. Libera Folio publikigas la tekston de la rezolucio senŝanĝe.
Prezidento de Kroatio honoris Zamenhof
Kroata Esperanto-Ligo organizis la 13-an de aprilo okaze de la Tago de memoroj pri viktimoj de holokaŭsto kulturan programon en la zagreba Zamenhof-Strato. La programo omaĝis al la 90-a datreveno de la morto de Lazaro Ludoviko Zamenhof. Reprezentanto de la Juda Komunumo Bet Israel el Zagrebo, Jasminka Doma, parolis ĝenerale pri la signifo de holokaŭsto.
Esperanto rolos en planata televida parodio
Flandra reĝisoro planas fari parodian filmon pri la lastatempe furora ĝenro "realec-televido", kaj utiligi Esperanton. Dum la ĵus pasinta aranĝo Printempa Semajno Internacia okazis la unuaj prov-filmadoj kun pli ol dek gejunuloj, kiuj ricevis la taskon rakonti pri delogado. Poste publiko povos voĉdoni en retejo pri siaj preferataj kandidatoj.
UEA forigis decidon pri publikeco el sia retejo
En 1973 la tiama estraro de UEA decidis nuligi la konfidencecon de la estraraj diskutoj, kun la escepto de specialaj kazoj, rilataj ĉefe al personaj informoj pri unuopuloj. En sia kunsido de la 13-a ĝis la 15-a de aprilo 2007 la estraro de UEA aparte diskutis la publikecon de siaj protokoloj, kaj ĉi-foje "notis, ke pri informado al la Komitato validas paragrafoj en la statuto kaj regularo, kaj ke la estraraj protokoloj ĝenerale ne estas publikaj". Laŭ klarigo de prezidanto Renato Corsetti al Libera Folio, la estaro nun nuligis la decidon de 1973. La 16-an de aprilo la decido ankaŭ malaperis el la retejo de UEA. Libera Folio publikigas la kompletan tekston de la nuligita decido.
La estraro de UEA decidis kongresi en Pollando kaj sekretigi siajn protokolojn
La Universala Kongreso de Esperanto en 2009 okazos en Pollando. Tion decidis la estraro de UEA dum sia kunsido en Roterdamo de la 13-a ĝis la 15-a de aprilo. La estraro aparte diskutis la publikecon de siaj protokoloj, kaj "notis, ke pri informado al la Komitato validas paragrafoj en la statuto kaj regularo, kaj ke la estraraj protokoloj ĝenerale ne estas publikaj". Tiu frazo en la estrara komuniko al la komitato estas iom enigma, ĉar jam en 1973 la estraro de UEA decidis "nuligi la konfidencecon de la estraraj diskutoj antaŭ la Komitato kun escepto de unuopaj decidoj, kiuj pro specialaj kaŭzoj, precipe personaj, postulas konfidencecon". Laŭ respondo de Renato Corsetti al demando de Libera Folio, la estaro nun malvalidigis tiun decidon. Ni publikigas la kompletan tekston de la estara komuniko sendita al la komitato.
Pola Radio intervjuis la redaktoron de Libera Folio
Okaze de la kvarjara jubileo de Libera Folio, la esperantlingva elsendo de Pola Radio intevjuis la redaktoron de Libera Folio, Kalle Kniivilä.
La redaktoro de Libera Folio deklarita Unika Persono Ne Grata
Kalle Kniivilä estas la Unua kaj Unika oficiale deklarita Persono Ne Grata de la Esperanta Respubliko en la tuta universo.
Kunveno planata por fintraduki Openoffice.org
OpenOffice.org estas projekto kiu celas kunlabore krei liberan, senpagan, bonkvalitan, internacian oficejan komputil-programaron, kiu funkcios per ĉiuj gravaj operaciaj sistemoj. La programaro jam ekzistas en multaj lingvoj, sed la esperanta traduko ankoraŭ ne pretas.
Moskva gazeto: "Esperanto povos iĝi deviga studobjekto"
La ĉiutaga Moskva gazeto Veĉernjaja Moskva (Vespera Moskvo) la 3-an de aprilo raportis pri la konferenco "Propedeŭtika rolo de Esperanto en lernado de fremdaj lingvoj", okazonta en Moskvo la 13-an de aprilo. La reta versio de la artikolo estas ornamita per Esperanto-flago. La titolo de la artikolo estas neatendite kaj senbaze frapa: "Studado de Esperanto iĝos deviga?". Ankaŭ aliaj asertoj en la teksto ŝajnas ne tute fidindaj. Ni publikigas tradukon de la kompleta artikolo.
Konferenco pri la rolo de Esperanto en Rusiaj edukejoj
La 13-an de aprilo sub la egido de la socia organizaĵo "Rusia Akademio pri Klerigo" en Moskvo okazos konferenco kun la titolo "Propedeŭtika rolo de Esperanto en lernado de fremdaj lingvoj". La intertraktadoj de rusiaj esperantistoj kun la registaro de Moskvo pri eventuala Universala Kongreso en Rusio akcelis la aranĝon, kiun aktive partoprenas la ministerio pri klerigo kaj scienco.
