Kniivilä gajnas finnan premion
Raportu mem en Libera Folio
Se vi membriĝis en Libera Folio, vi povas mem verki novaĵetojn kaj proponi ilin por publikigo.
Esperanto ricevis Michelin-stelon
La relative nova Stokholma restoracio kun la nomo Esperanto ricevis unu stelon en la prestiĝa restoracia gvidlibro Michelin. La stelo tamen ne estas verda. Nun estas en Svedio naŭ restoracioj kiuj havas unu stelon de Michelin, kaj nur unu restoracio kun du steloj. La posedantoj de restoracio Esperanto ne estas konataj kiel esperantistoj, sed ŝajne elektis la nomon pro ĝia ekzoteco. En la mondo ekzistas multaj aliaj restoracioj kun la sama nomo, ekzemple en Argentino, Aŭstralio, Belgio, Britio, Rumanio, Rusio kaj Usono.
Aŭtomata tradukado al Esperanto preparata en Katalunio
En Katalunio estas ekpreparata profesi-nivelaj komputilaj programoj por aŭtomata tradukado el la kataluna kaj hispana al Esperanto. Sub la kunordigo de profesoro Núria Bel kaj kun la helpo de Kataluna Esperanto-Asocio, skipo de lingvistoj dediĉos dek monatojn al la tasko. En Katalunio aŭtomata tradukado estas tre progresinta fako, interalie pro la bezonoj de dulingve aperantaj ĵurnaloj.
Andrej Grigorjevskij plu prezidos REU
La 8-an de marto, dum la Rusia Esperanto-Kongreso en Tiĥvin, Andrej Grigorjevskij estis reelektita kiel la prezidanto de Rusia Esperanto-Unio.
Lingvaj festivaloj debatigas en Rusio
Komence de marto okazis du esperantistaj Lingvaj Festivaloj en Rusio. Lige kun tio ekflamis debato pri la utilo de tiaj festivaloj en la diskutejo de Rusia Esperanto-Unio. Lingvaj Festivaloj celas en interesa kaj amuza maniero informi la publikon pri diversaj lingvoj, interalie Esperanto, kaj estas ofte aranĝataj de esperantistoj en diversaj landoj. La unua konata esperantista Lingva Festivalo estis aranĝita en Tuluzo en Francio en 1987. Dimanĉe la 4-an de marto okazis la unua Lingva Festivalo en Sankt-Peterburgo en Rusio. Alia Lingva Festivalo estis planata por la landa Esperanto-kongreso, nun okazanta en la urbo Tiĥvin.
Esperanto en la Internacia Libro-foiro en Jerusalemo
La internacia lingvo partoprenis en la 23-a Internacia Libro-Foiro en Jerusalemo. Esperanto-Ligo en Israelo luis grandan budon kie estis eksponitaj centoj da Esperanto-libroj, gazetoj kaj kompaktdiskoj, scienca kaj faka literaturo, turismaĵoj, vortaroj kaj lernolibroj.
Komitatanoj de UEA elektitaj sen voĉdono
Pro malgranda interesiĝo pri la posteno, ne necesis voĉdono pri komitatanoj B de UEA. Nur kvin kandidatoj sin anoncis por la elektado de komitatanoj B, kiuj reprezentas la individuajn membrojn en la supera organo de UEA. Povis esti elektitaj sep komitatanoj B. Ĉar estis malpli da kandidatoj ol postenoj, la kvin kandidatoj estas aŭtomate elektitaj kaj poŝta voĉdonado de membroj ne estas bezonata.
Dek jaroj sen Lena
Antaŭ dek jaroj en Moskvo post turmenta malsano forpasis Lena Lebedeva. Ŝi naskiĝis en 1965, estis esperantisto ekde 1981, kaj dum jaroj ŝi estis unu el la ĉefaj motoroj de la junulara Esperanto-movado en Sovetio kaj Rusio. Ŝi estis ankaŭ estrarano de TEJO kaj kunorganizis multajn Esperanto-renkontiĝojn, interalie la Internacian Junularan Kongreson en Sankt-Peterburgo (1995). Sen Lena ne okazus en 1994 "La Granda Trajnvojaĝo" el Moskvo, tra Siberio, al la IJK en Koreio. Ŝi estis la edzino de Andrej Ananjin. "Tiuj, kiuj ne memoras ŝin, simple ne havis feliĉon bone koni ŝin", skribas Grigorij Arosev memore al Lena.
Israela ĵurnalo menciis Liberan Folion
La legantoj de la prestiĝa israela gazeto Haaretz povis vendrede informiĝi pri la ekzisto de Libera Folio. Ni publikigas tradukon de la koncerna teksto.
EU-reguloj nuligas Civitan "establon" en Svedio
La sola organiza apogpunkto de la Esperanta Civito en norda Eŭropo ĝis nun situis en Lesjöfors, en la manĝejo de la Esperanto-domo en Lesjöfors, en maldense loĝata parto de meza Svedio. La manĝejo kun la kvazaŭ-esperanta nomo Bon' Apetit' aliĝis al la Esperanta Civito en la jaro 2003. La 21-an de februaro 2007 Esperantogården anoncis, ke la manĝejo estos fermita pro la reguloj de Eŭropa Unio rilate manĝaĵ-higienon.
ILEI kaj UEA ĉe interregistara forumo
En la dua semajno de februaro Internacia Ligo de Esperantistaj Instruistoj (ILEI) kaj UEA estis reprezentitaj en interregistara forumo organizita de la Konsilio de Eŭropo en Strasburgo. La temo de la forumo estis la Komuna Eŭropa Referenckadro pri lingvoinstruado kaj lingva taksado. Ĝuste pri tiu temo ILEI kaj UEA antaŭ kelkaj semajnoj publikigis novan normigan broŝuron.
Esperanto prezentota en Jerusalema librofoiro
Ĉiun duan jaron okazas en Jerusalemo internacia librofoiro, alloganta milojn da vizitantoj. Ĉi-jare, Esperanto-Ligo en Israelo luis budon en la foiro por prezenti Esperanton kaj ties kulturon dum la tuta semajno, de la 18-a ĝis la 23 de februaro.
Esperantista aventurulo rezignis pri monda piedirado
La itala esperantisto Marino Curnis fluge revenis el Irano al Italio, post malsukcesaj provoj ricevi vizon por marŝado tra centr-aziaj landoj cele al Japanio. La vojaĝo de Marino Curnis komenciĝis el Italio en januaro 2006. Li marŝis pli ol 6.000 kilometrojn tra naŭ landoj, sed devis fine rezigni pri sia plano marŝi ĝis Japanio kaj reen, ĉar li ne ricevis la bezonatajn vizojn.
Prestiĝa gazeto en Israelo artikolas pri Esperanto
Unu el la plej prestiĝaj israelaj gazetoj, Haaretz, en sia vendreda suplemento la 9-an de februaro publikigis artikolon pri Esperanto. La teksto estis ero en kvinpaĝa artikolaro pri internaciaj lingvoj nuntempe, kaj ŝajne rezultis el pli fruaj kontaktoj de Amri Wandel kun la gazeto, lige kun la nuligo de la Esperanto-redakcio de Pola Radio. Nenio tamen estas menciita pri la decembraj kontraŭjudaj eldiraĵoj de estrarano de Pola Radio. Ni publikigas la tutan tekston de la artikolo en esperanta traduko.
Konsilio de Eŭropo kunlaboras kun UEA pri lingvotaksado
Post kunlaboro inter la Konsilio de Eŭropo, UEA, la reta iniciato edukado.net kaj Internacia Ligo de Esperantistaj Instruistoj (ILEI), la 30-an de januaro en la reta katalogo de la libroservo de UEA aperis nova normiga broŝuro pri lingvoekzamenado. La apero de la broŝuro estas grava por unuecigi la ekzamen-sistemon kaj rilatan terminologion en Esperanto, diras unu el la ĉefaj aktivuloj de la projekto, Katalin Kováts. Sed aparta lingvopolitika sukceso estas laŭ ŝi ankaŭ la fakto, ke la Lingva Departemento de la Konsilio de Eŭropo en Strasburgo nun donis permeson por la esperantigo de sia ĉefa dokumento pri la temo, kaj pozitive rilatas al UEA kaj ILEI, kiel reprezentantoj de la tutmonda esperantistaro. En februaro reprezentanto de UEA kaj ILEI invitite partoprenos interregistaran forumon de la Konsilio de Eŭropo pri lingvotaksado.
Kuba Esperanto-Asocio kondamnas Usonon
La ŝtata kuba novaĵagentejo ACN lunde la 29-an de januaro diverslingve dissendis informon, laŭ kiu la komitato de Kuba Esperanto-Asocio kondamnas la politikon de Usono. En sia deklaro Kuba Esperanto-Asocio ankaŭ bonvenigis la lastatempajn politikajn evoluojn en la latinamerika regiono kaj subtenis "efikan instruadon de fremdaj lingvoj". La artikolo de ACN ne citas ajnan mencion de Esperanto en la deklaro de la landa asocio de UEA.
Takeuti Yosikazu testamentis al la Esperanto-movado
Takeuti Yosikazu, honora membro de UEA forpasinta aŭtune 2005, testamentis al la Esperanto-movado dek milionojn da japanaj enoj, aŭ proksimume 64.000 eŭrojn. Tiel informis la plej granda japana gazeto Mainichi Shimbun en paĝo de lokaj novaĵoj la 20-an de januaro.
Renato Corsetti en Asahi Shimbun: la tuta teksto
Lunde la 22-an de januaro aperis intervjuo de Renato Corsetti en Asahi Shimbun, unu el la plej grandaj ĵurnaloj de Japanio. Ni aperigas tradukon de la teksto, dissenditan al la komitato de UEA.
Esperantista kristnaska arbo la plej granda en la mondo
La libro pri mondaj rekordoj de Guiness konfirmis, ke la plej granda elektra kristnaska arbo en la mondo estas tiu sur la monto Mammucro ĉe la urbo San Vittore del Lazio en Italio. La figuro de kristnaska arbo, formita el diverskoloraj lampoj, estis 425 metrojn alta kaj konsistis el pli ol mil ampoloj, kiuj lumis ĝis la 6-a de januaro. La arbon ŝaltis la prezidanto de Itala Esperantista Junularo, Nicola Ruggiero, la 8-an de decembro, kaj pinte de ĝi videblis verda stelo.
Amaskomunikiloj rimarkis la Novjaran Renkontiĝon en Trier
La germana gazetaro amplekse raportis pri la 5-a Novjara Renkontiĝo en Trier. Raporto de la germana novaĵagentejo dpa aperis tutlande. Krome pri la aranĝo rakontis pluraj radi-stacioj kaj regiona televido.
